Urdu News and Media Website

شمالی یورپ ،شدید طوفان نے تباہی مچادی، 8 افراد ہلاک

تیز ہوائیں چلنے سے کئی درخت گر گئے ،مکانوں کی چھتیں اڑ گئیں،300 زائد پروازیں منسوخ

برلن(مانیٹرنگ ڈیسک)شمالی یورپ کے ممالک میں شدید طوفان کی زد میں آکر 8 افراد جاں بحق ہو گئے ، طوفان کے سبب تیز ہوائیں چلنے سے کئی درخت گر گئے اور مکانوں کی چھتیں اڑ گئیں جبکہ پروازیں بھی متاثر ہوئی ہیں ۔غیر ملکی میڈیا کے مطابق شمالی یورپ کے ممالک شدید طوفان کی زد میں ہیں، جہاں چلنے والی تندوتیز ہواں کی زد میں آ کر اب تک کم سے کم آٹھ افراد جاں بحق ہو گئے ہیں۔جرمنی اور نیدرلینڈز میں طوفان کے سبب تیز ہوائیں چلنے سے کئی درخت گر گئے ہیں اور مکانوں کی چھتیں اڑ گئی ہیں۔شمالی یورپ میں 140 کلومیٹر فی گھنٹے کی رفتار سے سرد ہوائیں چل رہی ہیں۔ جرمنی میں ٹرین سروس معطل ہے جبکہ نیدرلینڈز کے ہوائی اڈے پر کچھ دیر کے لیے پروازوں کی آمدورفت بھی معطل رہی۔تین سو سے زیادہ پروازین منسوخ ہوئی ہیں اور مسافروں سے کہا گیا ہے کہ وہ ایئر پورٹ پر آنے سے پہلے ایئر لائنز سے رابطہ کریں۔یہ طوفان جمعے کو جرمنی سے گزرتے ہوئے سنیچر کی شام تک پولینڈ پہنچے گا۔طوفان کے سبب برطانیہ میں بھی تیز ہوائیں چلیں، جس سے درخت گر گئے اور ہزاروں مکانوں کو بجلی کی سپلائی منقطع ہو گئی۔محکم موسمیات نے لوگوں کو خبردار کیا ہے کہ وہ غیر ضروری طور پر گھر سے باہر نہ نکلیں۔ سردی بڑھنے کے سبب سکول بھی بند ہیں۔ٹوئٹر پر مختلف افراد نے درخت گرنے اور ٹرک الٹنے کی تصاویر شیئر کی ہیں۔جرمنی میں ایک ٹرانسپورٹ ویب سائٹ کے مطابق تیز ہواں کے سبب 17 ٹرک الٹ گئے ہیں۔ ڈچ ریلوے کا کہنا ہے کہ ٹرین سروس کو بجلی فراہم کرنے والی پاور لائنز پر درخت گر گئے ہیں۔

تبصرے